7. Dezember 2020


Es isch scho fyschter z Bethlehem,
U d Strasse sy bald läär.
Da chöme dür ne stilli Gass
Zwöi Lütli no derhär

Vergäbe hei si mängi Stund
Es Plätzli gsuecht für d Nacht.
U niene chöi si zueche cho.
Das het ne Sorge gmacht.

D Maria isch so grüüsli müed,
Der Joseph het o gnue.
Är seit: «Im Stedtli isch nümm Platz,
So muess’s e Schafstall tue».

U richtig, da isch eine läär,
Gschwind tuet är ds Türli uuf,
Är bindet ds Eseli schnäll aa
U tuet e länge Schnuuf!

Es het ihm gwohlet fei e chly,
D Maria isch o froh.
U i däm Stall hei si du gly
Der Heiland übercho!